Нийслэлийн хэмжээнд 15 машин, 30 ариутгагчаар үерийн дараах ариутгал халдваргүйтгэл хийж байна
Улаанбаатар хотод хоёр хоногийн турш 23-32 мм, 12 мм хур тунадас орж, зарим хэсэгт үерлэсэн. Өчигдөр шөнө нийслэлийн тохижилт үйлчилгээ, геодези, усны барилга байгууламжийн ажилтнууд 24 цагийн турш бэлэн байдлыг хангаж, авто зам болон шүүрт худаг, ус зайлуулах шугам хоолойг цэвэрлэж, ус соруулж, үерийн дараах ариутгал халдваргүйтгэлийг хийлээ. Тухайлбал, Хот тохижилтын газрын 5, хувийн хэвшлийн 10 машин, 30 ариутгагчаар хотын гудамж, замуудад ариутгал халдваргүйтгэл шөнийн 02:00 цагаас эхлэн хийж байна.
Энэ талаар УБЗАА-ны Орчны бохирдол, хог хаягдлын удирдлагын хэлтсийн мэргэжилтэн Б.Мөнхжаргал “Их хэмжээний борооны улмаас Улаанбаатар хотод үер болж, халдварт өвчин тархахаас урьдчилан сэргийлж, ариутгал халдваргүйтгэлийн ажлыг зохион байгуулж байна. Хот тохижилтын газрын тусгай зориулалтын машин техникүүдээр тусгай зөвшөөрөл бүхийн хувийн хэвшлийн компаниудыг дайчлан ариутгал халдваргүйтгэл хийлээ. Нийт 15 машин, 30 ариутгагчтай ажиллаж байна. Их Британи улсад үйлдвэрлэсэн “Просан” ариутгал халдваргүйтгэлийн бодисыг ашиглалаа. Үерийн ус их урссан бохирдсон гудамж, талбайд түрүүлж ариутгал хийгээд, нийслэлийн хэмжээнд бүх нутаг дэвсгэрт ажлыг үргэлжлүүлж хийж байна” гэлээ.
Сэтгэгдэл