Politic Logo

Монгол Улсад зохион байгуулах НҮБ-ын Цөлжилттэй тэмцэх тухай конвенцын Талуудын 17 дугаар бага хурлын үеэр ажиллах 600 сайн дурын ажилтныг сонгон шалгаруулж, сургалтад хамруулж байна.

Сайн дурын ажилтнаар ажиллах хүсэлтээ 2000 гаруй иргэн ирүүлснээс 600 хүнийг сонгон авчээ. Мөн олон улсын арга хэмжээнд ажиллах сайн дурынхны бүрэлдэхүүнд ахлах ангийн 100 сурагчийг хамруулахаар төлөвлөсөн байна.

Сайн дурын ажилтнууд COP17 бага хурлын зохион байгуулалтын үеэр зочид, төлөөлөгчдөд мэдээлэл өгөх, чиглүүлэх болон хурлын хэвийн үйл ажиллагааг хангахад дэмжлэг үзүүлэх юм.

COP17 бага хурлын бэлтгэл ажлын хүрээнд барилга угсралт, дэд бүтцийн ажлыг дуусгаж, хурлын талбайг НҮБ-ын талд хүлээлгэн өгөх ажлыг зохион байгуулж байна. Мөн бага хурлын үеэр төсөл, хөтөлбөрөө танилцуулах 700 гаруй хүсэлт ирүүлжээ.

Монгол Улс энэ удаагийн бага хурлаар бэлчээрийн менежмент, ус болон газрын нэгдсэн удирдлага, байгальд суурилсан дэд бүтцийн шийдэл гэсэн гурван үндсэн чиглэлд олон улсын анхаарлыг хандуулахаар төлөвлөж байна.

НҮБ-ын Цөлжилттэй тэмцэх тухай конвенцын Талуудын 17 дугаар бага хурал нь газрын доройтол, цөлжилт, гангийн асуудлыг олон улсын түвшинд хэлэлцэж, шийдвэрлэхэд чиглэсэн томоохон арга хэмжээ юм.