Politic Logo

Зам тээврийн сайд Л.Халтар өнөөдөр Эрдэнэт үйлдвэрт ажиллаж, тус үйлдвэрийн дэргэд байгуулсан Ойн генетикийн төвийн үйл ажиллагаа, Хаягдлын аж ахуйд хийж буй мод үржүүлэг, мод тарих ажлын явцтай танилцлаа.

Тэрээр Улаанбаатар төмөр зам, Монголын төмөр зам, Зүүнбаян, Болд төмөр Ерөө гол, Тавантолгойн төмөр зам зэрэг говийн бүсэд баригдаж буй шинэ төмөр замуудын удирдлагуудын хамт хүрэлцэн ирж, Ойн генетикийн төвийн мэргэжилтнүүдтэй санал солилцсон. Уулзалтын эхэнд “Эрдэнэт үйлдвэр” ТӨҮГ-ын Тамгын газрын дарга Д.Үүрийнтуяа, Ойн генетикийн төвийн дарга Я.Ариунзул нар төвийн үйл ажиллагаа, зорилго зорилтоо  дэлгэрэнгүй танилцуулав.  

Энэ үеэр Зам тээврийн сайд Л.Халтар “Ер нь говийн бүсэд баригдаж буй төмөр замууд, одоо ашиглаж буй төмөр зам дагуух цөлжилтийн асуудал хүнд байгаа. Тиймээс бид энэ чиглэлээр цаг алдалгүй үр дүнтэй ажиллах ёстой. Харин Эрдэнэт үйлдвэрийнхний санаачилга цагаа олсон чухал ажил болжээ.  Олон жил улсынхаа төсвийн цоорхойг Эрдэнэт үйлдвэр нөхөж, Монголчуудыг тэжээж ирсэн. Энэ өгөөжтэй уулын баялгийг экспортын бүтээгдэхүүн болгож, орлогоос нь тодорхой хөрөнгө оруулалт гарган Ойн генетикийн төв байгуулан ажиллаж байгаа Эрдэнэт үйлдвэрийн хамт олонд туйлын талархалтай байна. Бид өмнө нь  мод тарина гэхээр ойгоос хамгийн залуу модыг авчраад тарина гэсэн төсөөлөлтэй байсан. Тариад, маргааш нь мартдаг том дутагдалтай байлаа. Тэгвэл одоо ойгоос мод зөөдөг биш үрээр нь яаж тарьж, Монгол орны газар нутгийг хэрхэн ойжуулж, цөлжилтөөс хамгаалахад зориулах вэ гэдэгт энэхүү Ойн генетикийн төв чухал ач холбогдол үзүүлэх юм байна гэдгийг өнөөдөр харлаа. Тодорхой хугацааны дараа Монгол Улс ногоон улс болно гэдэг Ерөнхийлөгчийн том зорилт яриа төдий биш бодит ажил хэрэг болж, удахгүй ойгоос бус үржүүлгийн газраас үр авчирч, мод тарих сайхан боломж энд бүрдсэн байна. Иймд Эрдэнэт үйлдвэрийн дэргэдэх Ойн генетикийн төвтэй хамтран ажиллаж, төвийн мэргэжилтнүүдээс зааварчилгаа зөвлөмж авна. Түүнчлэн төмөр замын байгууллагуудын дунд хөрөнгө оруулалтын асуудлыг шийдэж, Ойжуулах анги байгуулах боломж нөхцөлийг судалж үзнэ. Ингэснээр тэнд ажиллах мэргэжилтнүүдээ энэ төвд сургаж, туршлагажуулан ирэх хавраас ойжуулах ангийн бүтээн байгуулалтыг эхлүүлнэ” гэж онцоллоо.