Politic Logo

Швейцарын Холбооны Улсад коронавирусний халдварын тохиолдол сүүлийн өдрүүдэд эрс нэмэгдэж, 2020 оны 7 дугаар сарын 27-ны өдрийн байдлаар шинээр 99 тохиолдол бүртгэгдээд байна. Энэ 7 дугаар сарын 18-нд Женев хотын “Rooftop” баранд 20 гаруй хүн нэг доор халдвар авч халдварын голомт үүсээд байгаа бөгөөд өнгөрсөн долоо хоногт Женев кантонд 200 гаруй шинэ тохиолдол бүртгэгдээд байна.

Женев кантон нь халдварын дэгдэлт хамгийн их байгаа кантонуудын нэг болоод байгаатай холбогдуулан Женев кантоны удирдлага 7 дугаар сарын 28-наас дэлгүүр, онгоцны буудал болон бусад үйлчилгээний байгууллагаар үйлчлүүлж буй иргэд зайлшгүй амны хаалт хэрэглэх шаардлагатай гэсэн шийдвэрийг гаргаад байна.

Мөн Женев дэх зарим улсын ЭСЯ-ны ажилтнууд ч коронавирусний халдвар аваад байгаа нь тогтоогдоод байгаа тул  иргэд Та бүхэн суугаа орны зүгээс хэрэгжүүлж буй дээрх арга хэмжээг мөрдөж, ЭСЯ-нд консулын үйлчилгээ авахаар ирэхдээ амны хаалт хэрэглэн ариун цэвэр халдваргүйжүүлэлтийн дүрмийг чанд сахина уу.

Мөн ЭСЯ-нд иргэдийн бөөгнөрөл үүсгэх нь халдварын эрсдэлийг нэмэгдүүлж байгаа тул иргэд Та бүхэн халдвараас өөрсдийгөө болон гэр бүлийн гишүүдээ хамгаалах зорилгоор консулын үйлчилгээний цагаасаа хоцрохгүй байх, онцын шаардлагагүй тохиолдолд гэр бүлийн гишүүд, бага насны хүүхэд болон бусад хүмүүсийг дагуулж хамт ирэхгүй байхад анхаарна уу.

Женев дэх Монгол Улсын Элчин сайдын яам