Politic Logo

Монгол Улсын Ерөнхий сайд Л.Оюун-Эрдэнэ Бүгд Найрамдах Польш Улсын Ерөнхийлөгч Анджей Дудаг хүндэтгэн бараалхаж, өдрийн зоог барив. Уулзалтын үеэр талууд хоёр орны харилцаа, хамтын ажиллагааны асуудлаар санал солилцож, эдийн засгийн хамтын ажиллагааг эрчимжүүлэхээр тохиролцлоо.

Талууд хоёр улсын худалдааны нийт эргэлт 2022 онд түүхэн дээд хэмжээнд буюу 100 орчим сая ам.долларт хүрч, сүүлийн гурван жилийн хугацаанд хоёр дахин нэмэгдсэнийг онцолж, хоёр орны харилцаа, хамтын ажиллагааг эдийн засгийн агуулгаар баяжуулах, урт, дунд хугацааны хөгжлийн зорилтуудыг хангахад чиглэсэн бүтээн байгуулалт, экспортыг тэтгэсэн томоохон төсөл хамтран хэрэгжүүлэх талаар ярилцлаа.

Тээвэр логистикийн асуудал чухлаар тавигдаж байгаа өнөө үед "Олон улсын авто тээврийн харилцааны тухай Монгол Улсын Засгийн газар, Бүгд Найрамдах Польш Улсын Засгийн газар хоорондын хэлэлцээр" байгуулсныг сайшааж, энэ хэлэлцээрийг хэрэгжүүлснээр Ази-Европыг холбосон тээврийг хөнгөвчлөх, худалдааны эргэлтийг өсгөхөд таатай нөхцөл бүрдэж байгааг тэмдэглэв.

Мөн хоёр улс геологи, шинжлэх ухаан, соёл урлагийн салбарын хамтын ажиллагааг өргөжүүлэх, эрүүл мэнд, хүнсний аюулгүй байдлыг хангах чиглэлээр бодит ахиц гаргаж ажиллахаар тохиролцлоо.