Politic Logo

Тухайн үед ИЗНН-ын гурван даргын нэг болох Д.Энхбатыг намаас нь шахаж гаргалаа гэх шүүмжлэлд өртсөн тус намын С.Дэмбэрэл ярилцлагадаа “Д.Энхбат надад хэлэхдээ өнгөрсөн дөрвөн жил парламентад намаа төлөөлж ганцаараа суулаа. Парламентад цөөхүүлээ суух дэмий юм байна. Би УИХ-д суугаад шал дэмий 4 жилийг үрлээ. Ингэж дахин цагаа үрмээргүй байна. Тиймээс УИХ-д нэр дэвшихгүй” гэж хэлсэн. Харин сонгуулийн дараа “Энэ улс оронд стратеги алга. Ийм байхад би намын үйл ажиллагаанд идэвхтэй оролцох шаардлага ч алга  Тиймээс би татгалзлаа” гэж хэлсэн гэх ярилцлагыг С.Дэмбэрэл хэвлэлд өгч байжээ.

Д.Энхбат нь 2014 онд хэвлэлд “Би парламентад суугаад хоёр дахь сонгуульд оролцоогүйгээ ухарлаа гэж боддоггүй. Парламентад суугаад тэнд шийдэл байдаггүй юм байна гэдгийг олж харсан. Одоо өөрийгөө вакцинжуулчихсан учраас улс төр, сонгууль гэж солиорч гүйлгүйгээр дараагийн ажлаа эхлүүлэх цаг нь болжээ” гэж ярьж байжээ. Д.Энхбатыг МНН, ИЗНН-ын даргын хувьд Ерөнхийлөгчийн сонгуульд нэр дэвших үү гэх яриа яригдах үед “Би Ерөнхийлөгчийн сонгуульд нэр дэвшихгүй. Мөнгөнд дуртай нь намын байраар битгий яв, бизнесээ л хий. Би дахиж эрх мэдлийн төлөө ажиллахгүй” гэх мэтээр хариулт өгдөг байв. Энэ 2021 онд “ХҮН”-ынхан Д.Энхбатад санал тавьснаар түүний үзэл бодол өөрчлөгдөж, улс төрд буцалтгүй эргэн орж, Ерөнхийлөгчийн сонгуульд нэр дэвших болсноо илэрхийлэх болсон. Д.Энхбат “Би ардчиллын хүн.  Би Ерөнхийлөгчийн сонгуульд хууль ёсыг сахиж, итгэл зүтгэл гарган оролцох болно” гэх үгээ хэлж “ХҮН”-аас нэр өрсөлдөнө хэмээж байна.

Д.Энхбатад улс төрөөс явж буйгаа зарласан он жилүүд байсан бол түүнд буцан ирэх он жил буюу Ерөнхийлөгчийн 2021 оны сонгууль байв.

Б.АНХМАА