“Монгол Улсын хууль сахиулах ажиллагаан дахь хүний эрх” төслийн бэлтгэл ажлыг хангаж байна
Хууль зүй, дотоод хэргийн яамны санаачилгаар НҮБ-ын Хөгжлийн хөтөлбөр “Монгол Улсын хууль сахиулах ажиллагаан дахь хүний эрх” төслийг хэрэгжүүлэхээр бэлтгэл ажлыг ханган ажиллаж байгаа ба уг төслийг АНУ-ын Мансууруулах бодис, хууль сахиулах асуудал хариуцсан товчоо санхүүжүүлэх юм.
Дээрх төсөл нь цагдаагийн болон бусад хууль сахиулах ажиллагаанд дагаж мөрддөг хууль тогтоомж, дүрэм, журам болон практик хэрэглээг боловсронгуй болгох, түүнчлэн хууль сахиулах алба хаагчдыг бэлтгэдэг үндсэн институт болох Дотоод хэргийн их сургуулиас олон улсын хүний эрхийн стандартад нийцсэн боловсрол олгох чадавхийг дэмжих замаар хууль сахиулах салбарт хүний эрхэд суурилсан хандлагыг бэхжүүлэх зорилготой юм.
Хууль зүй, дотоод хэргийн дэд сайд Б.Солонгоо, ХЗДХЯ-ны Бодлогын хэрэгжилтийг зохицуулах газрын дарга Э.Энхтуяа нар нь НҮБ-ын Хөгжлийн хөтөлбөрийн орлогч, суурин төлөөлөгч Лин Цао, НҮБ-ын Хөгжлийн хөтөлбөрийн ажилтан Л.Бархас нартай уулзаж, төслийн явц, зарим анхаарах асуудал болон төлөвлөгөөний талаар санал солилцлоо.
Эх сурвалж: Хууль зүй, дотоод хэргийн яам
Сэтгэгдэл