Politic Logo

Багийн залуусын дийлэнх нь гараа өргөв. Тэднээс гурвыг нь тайзнаа  урилаа. Уригдсан залуусын зарим нь тайзан дахь буйдан дээр тухлан, чөлөөтэй ярилцах. Эхний залуу Ус хангамжийн цехийн оператор Э.Чулуунтөр. Тэр энэхүү хөтөлбөрт хамрагдан, Г.Мөнгөн лекторын лекцэд сууж, 6 дансны арга ашигласнаар санхүүгийн сахилга бат илт сайжирсан гэнэ.  Орон сууц авахаар мөнгө хуримтлуулсан нь 40-өөд сая төгрөг болсон гээд хуримтлалыг зуршил болгоцгооё гэж уриалав. СААЖЦ-ын “Энэрэл” төвийн ажилтан Д.Мөнхцэцэг хөтөлбөрийн хүрээнд сурч мэдсэнээ гэр бүлдээ хэрэгжүүлснээр найман настай хүү нь ээж аавынхаа өгсөн халаасны мөнгөөр амттан авах биш хадгалж, хуримтлуулж эхэлсэн тухай, Дулааны цахилгаан станцын мастер Р.Болд-Эрдэнэ үр хүүхдийнхээ ирээдүйд зориулан данс нээсэн, төлөвлөөгүй орлогоо хуримтлуулдаг болсон, цар тахлын үед Улсаас чөлөөлсөн хэрэглээний зардлын мөнгөө хуримтлуулсан гэв. Хөтөлбөрт хамрагдсан залуусын төлөөллийн үг энэ. Тэдний ихэнх нь хуримтлуулах зуршил бүтээж буй гэсэн. 

Хоёр дахь үзүүлбэр “Career weekly show”. Шоуг хөтлөгч нь цог золбоотой залуу, бүсгүй хоёр. Тэдний эхний зочин Харвардын онлайн хөтөлбөрт оролцогч “Эрдэнэт цогцолбор” дээд сургуулийн электроникийн багш А.Түвшинжаргал. Энэ хөтөлбөр түүний  карьер хөгжилд эрс өөрчлөлт хийжээ. Залуу багшийн дадлагажуулагч багш нь Холбоо, мэдээллийн технологи, автоматжуулалтын цехийн электроникийн инженер Д.Гантулга. Хөтөлбөрийн хугацаанд Эрдэнэт үйлдвэрийн электроникийн болон автоматжуулалтын технологийн шинэчлэлүүдийг судлан, багштайгаа хамтран эрдэм шинжилгээ, сургалт үйлдвэрлэлийг холбон  ажиллах төсөл хөтөлбөр санаачилжээ. Мөн Харвардын менежментийн хөтөлбөрт хамрагдах алтан боломжийг үйлдвэрийн удирдлага түүнд өгчээ. Энэхүү шилдэг хөтөлбөрөөс олж авсан  стресс менежмент, цагийн менежмент, EQ чадвар зэрэг мэдлэгээ хамт олон, үеийн залуустаа түгээж буй аж. Тэрчлэн хөтөлбөрийн оролцогч Э.Оюун-Эрдэнэ  дадлагажуулагч багш, Оёдлын цехийн мастер Э.Уянгаас оёдлын нарийн тоног төхөөрөмж дээр хэрхэн ажиллах, хүнтэй ажиллах арга ажиллагаа, ажилчдад тулгарч буй асуудлыг шийдвэрлэх арга зам зэрэгт суралцжээ. Зураг төслийн хүрээлэнгийн инженер Х.Галхүү, Ерөнхий инженерээ дадлагажуулагч багшаар сонгон, ЗМЗ-ын Цутгуурын цехийн өргөтгөлийг орчин үеийн өндөр үр дүнтэй гурван хэмжээст зургийн программ дээр зурж, уг программаа хүрээлэндээ нэвтрүүлэхээр  зорьж байгаа тухай өгүүлэв. Технологийн сургуулийн залуу багш Б.Номин,  АНУ-ын Фэйрбанксын их сургуульд магистрын зэрэг хамгаалсан мэргэжил нэгт Д.Эрдэнэбаатар багш дээр дадлагажсанаар хичээлийн агуулга, мэргэжлийн мэдлэгээ төдийгүй  англи хэлний чадвараа богино хугацаанд сайжруулжээ. Өөрөө суралцахын зэрэгцээ шавь нартаа зааж сургаснаараа  ихээхэн давуу тал олж, том туршлага хуримтлуулсан гэв. 122 ажилтан 86 дадлагажигч багштай хамтран ажилласан байна. Хөтөлбөрт оролцогч бүхэн хөтөлбөрийг хэрэгжүүлсэн Үйлдвэрийн удирдлагадаа, хөтөлбөрийн ажлын хэсгийн хамт олонд, багш нартаа талархлаа илэрхийлэв.  

Ток шоуны “Хэлтэй бол хөлтэй” хэмээх хэсгийн ярилцлага англи хэлээр өрнөв.  Өрмийн туслах машинч залуу тайзнаа  хөтөлбөрийн хүрээнд англи  хэлний мэдлэгээ хэрхэн дээшлүүлсэн тухайгаа тухайн хэлээр чөлөөтэй ярьж буй нь энэ хөтөлбөрийн ач холбогдлыг эрхгүй харуулна. Хөтөлбөрт оролцогч залуусын 75 хувь нь 1-3 гадаад хэлээр ярьдаг байна. Хөтөлбөр эхэлснээс хойш 86,7 хувь нь гадаад хэлний мэдлэгээ дээшлүүлэхээр сургалтад хамрагджээ. 

“Гэр бүл”, “Харилцаа хандлага” сэдвээр олж авсан мэдлэгээ тайз дэлгэц хослуулсан уран сайхны тоглолтоор тайлагнасан  нь  үзэгчдийг баясгав. 

Төгсгөлд нь залуус санал хүсэлт бүхий баримт бичгээ Ерөнхий захиралд гардууллаа. Ерөнхий захирал Х.Бадамсүрэн: “Залуу ажилтныг дэмжих хөтөлбөрийн үр дүнд санал санаачилгаа нэгтгэж, үйлдвэрийн бодлогод үйлдвэрийн саналаа нэмэрлэж, тусгахаар өгч буй баримт бичгийг миний бие удирдлагын хувьд үнэ цэнтэй, сайхан бэлэг гэж хүлээж авч байна. Энд манай залуус таван санал дэвшүүлжээ. Эхний санал нь Залуу ажилтныг дэмжих хөтөлбөрийн үйл ажиллагааг үргэлжлүүлэх тухай бичжээ. Үүнийг улам боловсронгуй, төгөлдөр болгож хэрэгжүүлнэ. Дараагийн саналд туссанаар залуу ажилтнуудаа орчин цагийн хөгжил дэвшилд нийцүүлэн гадаад, дотоодын сургалтад хамруулна. Бүтцийн нэгж хооронд мэргэжлийн дагуу богино хугацаанд сэлгэх, дадлагажуулагч багш нартай гэрээ байгуулан ажиллуулах бодлогыг дэмжинэ. Түүнчлэн залуу ажилтнуудынхаа ажил амьдралын тэнцвэртэй байдлыг хангах, гэр бүлийн тогтвортой хамтын ажиллагааг дэмжих, амьдралын чанарыг сайжруулах зорилгоор залуучуудын хөгжлийг дэмжих сан байгуулах та бүхний  саналыг хүлээн авч байна. Үүнийг хууль дүрэмд нийцүүлэн байгуулна. Энэ сангийн үйл ажиллагаа юунд чиглэж, ямар үр дүнд хүрэх ёстой гэдгийг залуус та бүхэнтэй хамтран тодорхойлж, шийднэ. Эцэст нь, шилдэг залуу ажилтнуудаа манлайлал, авьяас чадварын хөтөлбөрт үргэлжлүүлэн хамруулж, илүү хөгжил рүү хөтлөхдөө үйлдвэрийн удирдлагын зүгээс үргэлж бэлэн байх болно” гэв. 

Эрдэнэт үйлдвэр Залуусын хөгжлийг зөвхөн мэргэжлийн сургалтаар хязгаарлахгүй  хувь хүний, сэтгэл зүйн, гэр бүл болон санхүүгийн боловсролын хувьд нь хөгжүүлэх, бодлогоор дэмжиж буй нь төсөл хөтөлбөрийн явц, Удирдлагуудын байр сууринаас   тод  харагдаж байлаа.  Хүний нөөцийн алсын хараатай бодлого хэрэгжүүлэгч “Улсын Баатар” Эрдэнэт үйлдвэрийн баялаг бүтээгчдийн залуу үе өв тэгш хөгжиж, өнгөтэй жавхаатай байна.

Я.Энхтуяа
Фото: Б.Баттөгс